ABŞ Bank VTB-yə terroru maliyyələşdirmə iddiası ilə sanksiya tətbiq etdi
ABŞ Rusiyanın ən iri maliyyə qurumlarından biri olan VTB bankına İrana qarşı tətbiq olunan sanksiyalardan yayınmağa yardım etdiyi və terrorizmin maliyyələşdirilməsinə şərait yaratdığı iddiası ilə yeni məhdudiyyətlər tətbiq edib.
Xpress.az xəbər verir ki, bu barədə ABŞ Dövlət Departamentinin yaydığı açıqlamada bildirilib.
Amerika tərəfinin məlumatına görə, VTB İranda filiallar açıb və ABŞ sanksiyalarına məruz qalan maliyyə qurumları ilə əlaqələr yaradıb. Vaşinqton həmçinin bankın İranın milyardlarla dollar dəyərində aktivlərinin köçürülməsində iştirak etdiyini iddia edir.
ABŞ Dövlət Departamentinin qiymətləndirməsinə görə, bu əməliyyatlar İranın beynəlxalq maliyyə sisteminə çıxış əldə etməsinə və mövcud sanksiyalardan yan keçməsinə imkan verib.
Dövlət Departamenti bildirib ki, ABŞ İran hakimiyyətini xarici maliyyə mənbələri ilə əlaqələndirən maliyyə kanallarının qarşısını almağa davam edəcək.
Vaşinqton eyni zamanda maliyyə qurumlarını və şirkətləri İrana sanksiyalardan yayınmaqda yardım göstərməyin mümkün nəticələri barədə xəbərdar edib.
“İrana sanksiyalardan yayınmaqda kömək etmək cəhdi ciddi nəticələrə səbəb olacaq”, — deyə ABŞ Dövlət Departamentinin açıqlamasında vurğulanıb.
VTB-yə qarşı yeni məhdudiyyətlər ABŞ-ın Rusiyanın maliyyə sektoruna və Vaşinqtonun fikrincə, Tehranın beynəlxalq sanksiyalardan yayınmasına yardım edən qurumlara qarşı tətbiq etdiyi sanksiyaların genişləndirilməsi deməkdir.
