Kimlərə xəngəl yemək olmaz? – Mütəxəssislər xəbərdarlıq edir

Azərbaycanın ən sevilən yeməklərindən olan xəngəl dadlı olsa da, sağlamlıq baxımından müəyyən təhlükələr daşıyır. Mütəxəssislər bu ənənəvi yeməyin tərkibindəki yüksək yağ və karbohidrat miqdarının bir sıra xroniki xəstəliklərə zəmin yaratdığını bildirirlər.

Azərbaycan mətbəxi ilə bağlı aparılan son araşdırmalar xəngəl kimi ağır və yüksək kalorili yeməklərin tez-tez qəbulunun artıq çəki, ürək-damar xəstəlikləri və şəkərli diabet riskini artırdığını göstərir.

Xpress.az xəbər verir ki, mütəxəssislər bu yeməyin az porsiyada və ayda bir neçə dəfə istehlak edilməsini tövsiyə edir.

Dietoloq Aytac Quliyeva bildirib ki, xəngəl çox zəngin və doyumlu bir yemək olsa da, onun tərkibindəki maddələr sağlamlıq üçün müəyyən risklər yaradır:

"Xəngəl əsasən ağ un, yağ və qırmızı ət tərkiblidir. Bu isə deməkdir ki, yüksək miqdarda kalori, doymuş yağ və sadə karbohidrat ehtiva edir. Belə bir yeməyi müntəzəm şəkildə yemək insulin müqavimətini artırır, qaraciyər yağlanması və piylənmə riskini yüksəldir."

Ekspert əlavə edib ki, xəngəl xüsusilə axşam saatlarında yeyildikdə həzm sistemində yüklənməyə, qıcqırma və reflü kimi narahatlıqlara səbəb ola bilər.

“Ənənəvi xəngəldə çox zaman quyruq yağı və ya kərə yağı istifadə olunur. Bunlar doymuş yağlardır və uzunmüddətli istifadəsi xolesterin səviyyəsini artıraraq damar sərtliyi (ateroskleroz) riskini yüksəldir. Bu isə ürək tutmaları və insultlar üçün zəmin yarada bilər".