İrana zərbələrin təxirə salınmasının əsl səbəbi həcc ziyarətidir?
ABŞ Prezidenti Donald Tramp Fars körfəzindəki müttəfiqlərinin və öz rəsmilərinin "həcc ziyarəti zamanı müharibəni bərpa etməmək" barədə xəbərdarlıqlarından sonra İrana planlaşdırılan hərbi zərbələri təxirə salıb.
Bu barədə "Middle East Eye" nəşri məlumat yayıb.
Körfəz ölkələrindən olan iki yüksək rütbəli rəsminin sözlərinə görə, Trampa xəbərdarlıq edilib ki, həcc günlərində İrana hücum etmək ərəb dövlətlərinin daxilində ciddi böhrana səbəb ola bilər. Çünki regional gərginlik fonunda yüz minlərlə zəvvarın müqəddəs torpaqlarda blokadada qalma riski yaranacaq.
Mənbələr həmçinin bildiriblər ki, Qurban bayramı (İd əl-Ədha) ərəfəsində — bu müqəddəs dövrdə hərbi əməliyyatlara başlamaq Vaşinqtonun müsəlman dünyasındakı reputasiyasına düzəlməz zərbə vura bilər. Tramp administrasiyasındakı müzakirələrlə tanış olan yüksək rütbəli amerikalı məmurlardan biri də daxili məsləhətçilərin prezidenti eyni şəkildə "ciddi reputasiya itkisi" barədə xəbərdar etdiyini təsdiqləyib.
Baxmayaraq ki, ABŞ bundan əvvəl Ramazan ayında İrana zərbələr endirmişdi, həcc dövründə müharibənin alovlanması hər il milyondan çox xarici zəvvarı qəbul edən Səudiyyə Ərəbistanı üçün nəhəng logistik problemlər yarada bilər.
Bu çətinliklər həmçinin Qətər və BƏƏ kimi Körfəzin böyük aviasiya qovşaqlarına, eləcə də zəvvarların yola düşdüyü Cənubi və Şərqi Asiya ölkələrinə birbaşa təsir göstərəcək.
Qeyd edək ki, bu il həcc ziyarətinin mayın 24-də başlaması və altı gün davam etməsi planlaşdırılır. Hazırda yüz minlərlə müsəlman dini ritualların başlamasını gözləmək üçün artıq Səudiyyə Ərəbistanına gəlib.
