Naxçıvanda “TerraNext – Gənc Ekoliderlər Proqramı”na start verilib
Naxçıvanda gənclərin ekoloji biliklərinin artırılması, ətraf mühitin mühafizəsi sahəsində maarifləndirilməsi və ekoloji təşəbbüslərinin dəstəklənməsi məqsədilə “TerraNext – Gənc Ekoliderlər Proqramı”na start verilib.
Layihə çərçivəsində Naxçıvan Muxtar Respublikasının Şahbuz rayonunun Batabat ərazisində yerləşən Zəngəzur Milli Parkında proqramın açılış mərasimi və gənclər üçün “EcoStep” ekoloji düşərgəsi təşkil olunub.

Tədbir şəhidlərin əziz xatirəsinin bir dəqiqəlik sükutla yad edilməsi və Azərbaycan Respublikasının Dövlət Himninin səsləndirilməsi ilə başlayıb.
Açılış mərasimində Azərbaycan Respublikası Gənclər Fondunun Naxçıvan filialının əməkdaşı Dilarə Gülməmmədli çıxış edərək iştirakçıları salamlayıb və proqramın əhəmiyyətini vurğulayıb. Daha sonra layihə rəhbəri Aytac Əliyeva çıxış edərək proqramın məqsəd və vəzifələri, nəzərdə tutulan fəaliyyətlər və gənclərin layihə çərçivəsində iştirak imkanları haqqında məlumat verib.
Proqram panel müzakirəsi ilə davam edib. Gənclər və İdman Nazirliyinin əməkdaşı Ülvü Əliyevin moderatorluğu ilə keçirilən paneldə Naxçıvan Muxtar Respublikası Ekologiya və Təbii Sərvətlər Nazirliyinin əməkdaşı Əli Əlizadə, Naxçıvan Muxtar Respublikası Gənclər və İdman Nazirliyinin əməkdaşı Azad Əliyeva və “Naxçıvan Ekoloji Maarifləndirmə və Ətraf Mühitin Mühafizəsinə Dəstək” İctimai Birliyinin sədri Aygül Məmmədova iştirak ediblər.

Panel zamanı Naxçıvan Muxtar Respublikasında mövcud ekoloji problemlər, ətraf mühitin mühafizəsi, ekoloji maarifləndirmənin əhəmiyyəti, bərpaolunan enerji mənbələrindən istifadə və gənclərin ekoloji təşəbbüslərdə fəal iştirakı mövzularında fikir mübadiləsi aparılıb. İştirakçıları maraqlandıran suallar cavablandırılıb, ekoloji məsuliyyətin formalaşdırılması istiqamətində təkliflər səsləndirilib.
Panel müzakirəsindən sonra iştirakçılar üçün çay fasiləsi təşkil olunub. Ardınca gənclər Zəngəzur Milli Parkının İnformasiya Mərkəzinə ekskursiya edərək burada nümayiş etdirilən eksponatlarla tanış olub, milli parkın təbii sərvətləri və biomüxtəlifliyi haqqında ətraflı məlumat əldə ediblər.
Günün növbəti hissəsində təşkil olunan çay fasiləsindən sonra iştirakçılar Naxçıvan Muxtar Respublikasının Mərkəzi Günəş Elektrik Stansiyasına ekskursiya ediblər. Burada gənclərə günəş enerjisinin əldə olunması, bərpaolunan enerji mənbələrinin üstünlükləri və yaşıl enerjinin ətraf mühitin qorunmasındakı rolu barədə məlumat verilib.

Qeyd edək ki, “TerraNext – Gənc Ekoliderlər Proqramı” gənclərin ekoloji dünyagörüşünün inkişaf etdirilməsi, onların ətraf mühitin mühafizəsində fəal iştirakının təşviqi, ekoloji məsuliyyət və dayanıqlı inkişaf prinsiplərinin təbliği məqsədi daşıyır. Layihə çərçivəsində gənclərin nəzəri biliklərinin praktiki fəaliyyətlərlə möhkəmləndirilməsi və ekoloji təşəbbüslərin təşviqi istiqamətində müxtəlif tədbirlərin həyata keçirilməsi nəzərdə tutulur.
