Kamran Razmovar: “Müharibədən əvvəl daha yaxşı qazanırdım, bu videoları vətənə faydam olsun deyə çəkdim” - VİDEO
Tanınmış blogger Kamran Razmovar aparıcı Firuzə Cəlilovanın “Fira Cəlilova ilə TET A TET” podkastının qonağı olub.
Xpress.az xəbər verir ki, podkastda iştirak edən blogger sosial şəbəkələrdə paylaşdığı, Ermənistanın baş naziri Nikol Paşinyanla bağlı videolarından, bu fəaliyyətə başlamasının səbəblərindən və üzləşdiyi təhdidlərdən danışıb.
Kamran Razmovar bildirib ki, bəzi insanlar onun çəkdiyi videolar hesabına avtomobil və mənzil aldığını düşünürlər. Lakin bloggerin sözlərinə görə, o, bu fəaliyyətə başlamazdan əvvəl daha yaxşı qazanc əldə edirdi.
O qeyd edib ki, müharibə başlayanda özünə bu prosesdə Azərbaycanın xeyrinə nə edə biləcəyi barədə sual verib və çəkdiyi videolarla vətənə töhfə vermək qərarına gəlib.
Blogger Ermənistan tərəfdən təhdidlər aldığını da açıqlayıb:
“Bir ölkəyə gedə bilmirəm. İrana, Rusiyaya, Gürcüstana, Amerikaya gedə bilirəm. Ermənilər zəng edib məni tapacaqları ilə hədələyirlər”.
Paşinyanla bağlı hazırladığı satirik videolardan danışan Razmovar Azərbaycan cəmiyyətinin bəzən hadisələrə həddindən artıq yumşaq yanaşdığını bildirib.
Onun sözlərinə görə, Paşinyanın banan yeməsi, qutab yeməsi və “Aram-aram” mahnısına qulaq asması ilə bağlı görüntülərə aldanmaq olmaz. Blogger hesab edir ki, bu görüntülər onun daha səmimi görünməsi üçün qurulmuş bir şoudur.
Razmovar xatırladıb ki, müharibə dövründə Gəncənin bombalanması ilə bağlı əmrlər verildiyini və Azərbaycan əhalisinin bunu unutmamalı olduğunu düşünür. O, Paşinyanın ictimaiyyət qarşısında nümayiş etdirdiyi davranışlarla müharibə dövründəki hadisələrin müqayisə edilməsinin vacibliyini vurğulayıb.