Zavodda partlayış baş verib- 9 nəfər...

Xpress.az xəbər verir ki, Oktyabrın 22-də axşam saatlarında Çelyabinsk vilayətinin qubernatoru Aleksey Teksler bölgədə yerləşən müəssisələrdən birində partlayışın baş verdiyini açıqlayıb. O, bu barədə öz Telegram kanalında məlumat verib.

Tekslerin sözlərinə görə, partlayış Kopeysk şəhərindəki bir istehsalat obyektində qeydə alınıb. Qubernator hadisə nəticəsində ölənlərin olduğunu bildirib:

“Hadisə yerinə bütün fövqəladə xidmətlər cəlb olunub, qərargah yaradılıb,” – deyə Teksler qeyd edib.

Sonradan zavodda ikinci partlayış baş verib. Yanğının mənbəyi müəyyən edilib və onun söndürülməsi istiqamətində tədbirlər görülüb. Teksler vurğulayıb ki, bütün zəruri fövqəladə hallara müdaxilə qüvvələri və resurslar hadisə yerindədir.

Hazırda açıq alov söndürülüb, xilasedicilər dağıntıların təmizlənməsinə başlayıblar. Hadisə yerinə əlavə resurslar göndərilib.

Bundan əvvəl Çelyabinsk sakinləri partlayış səsləri eşitdiklərini bildiriblər. Səslər şəhərin Leninski rayonunda və Kopeyskdə də eşidilib. Partlayışlardan birinin Plastmass zavodunun yaxınlığında baş verdiyi ehtimal edilir.

Son məlumata görə, ölənlərin sayı 9 nəfərə çatıb. Əvvəlcə “112” Telegram kanalı 4 nəfərin öldüyünü bildirmişdi, daha sonra bu rəqəm 7-yə, sonda isə 9-a yüksəlib.

“Bir daha vurğulayıram: ölənlərin ailələrinə və yaxınlarına, eləcə də xəsarət alanlara – psixoloji dəstək də daxil olmaqla – bütün zəruri yardım göstəriləcək. Müvafiq işlər artıq təşkil olunub,” – deyə Aleksey Teksler bəyan edib.

Qubernatorun məlumatına görə, daha 5 nəfər müxtəlif dərəcəli xəsarətlər alıb. Tibb işçiləri onların vəziyyətini stabilləşdirmək üçün zəruri tədbirlər görürlər. İtkin düşən şəxslərlə bağlı məlumatlar dəqiqləşdirilir.